Nunc incubuisti tota in alteram partem et oblita meliorum fortunam tuam qua deterior est aspicis: non convertis te ad convictus filii tui occursusque iucundos, non ad pueriles dulcesque blanditias, non ad in- crementa studiorum; ultimam illam faciem rerum premis; illi, tamquam si parum ipsa per se horrida sit, quidquid potes congeris. Ne, obsecro te, concupieris perversissimam gloriam, infelicissima videri!