Disperii! Ctesiphonem audivi filium Una affuisse in raptione cum Aeschino. Id misero restat mihi mali, si illum potest Qui alicui rei est etiam eum ad nequitiam abducere. Ubi ego illum quaeram? credo abductum in ganeum Aliquo: persuasit ille impurus, sat scio. Sed eccum Syrum ire video: hinc scibo iam ubi siet; Atque hercle hic de grege illo est: si me senserit Eum quaeritare, nunquam dicet carnifex. Non ostendam me id velle. Omnem rem modo seni Quo pacto se haberet enarramus ordine: Nihil vidi quicquam laetius. Pro Iupiter, Hominis stultitiam! Collaudavit filium: Mihi qui id dedissem consilium egit gratias. Disrumpor. Argentum annumeravit ilico: Dedit praeterea in sumtum dimidium minae: Id distributum sane est ex sententia. Hem! Huic mandes, si quid recte curatum velis. Hem, Demea, haud aspexeram te. Quid agitur? Quid agatur? Vestram nequeo mirari satis Rationem. Est hercle inepta, ne dicam dolo, Atque absurda. Pisces ceteros purga, Dromo: Congrum istum maximum in aqua sinito ludere Paulisper: ubi ego venero, exossabitur; Prius nolo. Haecine flagitia! Mihi quidem non placent; Et clamo saepe. Salsamenta haec, Stephanio, Fac macerentur pulchre. Di vestram fidem, Utrum studione id sibi habet, an laudi putat Fore si perdiderit gnatum? Vae misero mihi! Videre videor iam diem illum quum hinc egens Profugiet aliquo militatum. O Demea, Istuc est sapere, non quod ante pedes modo est Videre, sed etiam illa quae futura sunt Prospicere. Quid? istaec iam penes vos psaltria est? Ellam intus. Eho an domi est habiturus? Credo, ut est Dementia. Haecine fieri! Inepta lenitas Patris et facilitas prava. Fratris me quidem Pudet pigetque. Nimium inter vos, Demea, ac Non quia ades praesens dico hoc, pernimium interest. Tu quantus quantus es nihil nisi sapientia es: Ille somnium. Sineres vero tu illum tuum Facere haec? Sinerem illum? an non sex totis mensibus Prius olfecissem quam ille quicquam coeperit? Vigilantiam tuam tu mihi narras? Sic siet Modo ut nunc est quaeso. Ut quisque suum vult esse, ita est. Quid eum? vidistine hodie? Tuumne filium? Abigam hunc rus. Iamdudum aliquid ruri agere arbitror. Satin scis ibi esse? Oh, qui egomet produxi. Optime est. Metui ne haereret hic. Atque iratum admodum. Quid autem? Adortus iurgio fratrem apud forum De psaltria istac. Ain vero? Vah, nihil reticuit. Nam ut numerabatur forte argentum intervenit Homo de improviso: coepit clamare, O Aeschine! Haecine flagitia facere te! haec te admittere Indigna genere nostro! Oh! lacrimo gaudio. Non tu hoc argentum perdis sed vitam tuam. Salvus sit, spero: est similis maiorum suum. Hui. Syre, praeceptorum plenus istorum ille. Phy. Domi habuit unde disceret. Fit sedulo. Nihil praetermitto: consuefacio: denique Inspicere tanquam in speculum in vitas omnium Iubeo, atque ex aliis sumere exemplum sibi. Hoc facito. Recte sane. Hoc fugito. Callide. Hoc laudi est. Istaec res est. Hoc vitio datur. Probissime. Porro autem— Non hercle otium est Nunc mihi auscultandi. Pisces ex sententia Nactus sum: hi mihi ne corrumpantur cautio est: Nam id nobis tam flagitium est quam illa, Demea, Non facere vobis quae modo dixti: et, quod queo, Conservis ad eundem istunc praecipio modum: Hoc salsum est; hoc adustum est; hoc lautum est parum, Illud recte: iterum sic memento: sedulo Moneo quae possum pro mea sapientia. Postremo tanquam in speculum in patinas, Demea, Inspicere iubeo, et moneo quid facto usus siet. Inepta haec esse nos quae facimus sentio: Verum quid facias? ut homo est, ita morem geras. Numquid vis? Mentem vobis meliorem dari. Tu rus hinc abis? Recta. Nam quid tu hic agas, Ubi si quid bene praecipias nemo obtemperet? Ego vero hinc abeo, quando is quamobrem huc veneram Rus abiit: illum curo unum: ille ad me attinet. Quando ita vult frater, de istoc ipse viderit. Sed quis illic est procul quem video? estne hic Hegio, Tribulis noster? si satis cerno, is hercle est: vah, Homo amicus nobis iam inde a puero. Di boni! Nae illiusmodi iam nobis magna civium Penuria est: homo antiqua virtute ac fide. Haud cito mali quid ortum ex hoc sit publice. Quam gaudeo ubi etiam huius generis reliquias Restare video! Ah, vivere etiam nunc libet. Opperiar hominem hic, ut salutem et conloquar.